ایل او سی پر کشیدگی،ملازمین کی چھٹیاں منسوخ

مظفرآباد (دھرتی نیوز) اسٹیٹ ڈیزاسٹر مینجمنٹ اتھارٹی (ایس ڈی ایم اے) کے اعلیٰ سطح کے اجلاس میں کشمیر کے آر پار بڑھتی ہوئی کشیدگی اور بھارتی جارحیت کے امکانات کے باعث تیاریوں کے اقدامات کا جائزہ لیا گیا۔ چیف سیکریٹری آزاد حکومت خوشحال خان کی زیر صدارت ہونے والے اجلاس میں اہم سرکاری محکموں کے سربراہان اور نمائندوں نے شرکت کی، اجلاس میں جنگ جیسی پیشرفت کی صورت میں محکموں اور اداروں کے کردار اور ذمہ داریوں کا جائزہ لینے پر توجہ مرکوز کی گئی اور کسی بھی صورتحال سے نمٹنے کے لیے مختلف احتیاطی تدابیر پر اتفاق کیا گیا۔چیف سیکریٹری نے تمام سرکاری محکموں اور اداروں کو ہائی الرٹ رہنے اور اس بات کو یقینی بنانے کی ہدایت کی کہ متعلقہ مشینری، آلات اور اہلکار فوری تعیناتی کے لیے تیار ہوں۔اجلاس میں محکمہ خوراک، جو عام طور پر ایل او سی سمیت دور دراز علاقوں میں خوراک کی سپلائی کا ایک ماہ کا ذخیرہ رکھتا ہے، کو ہدایت کی گئی کہ وہ اسٹاک کی مقدار کو دوگنا کرے۔ محکمہ صحت کو ہدایت کی گئی کہ وہ ادویات اور طبی عملے کی بلاتعطل دستیابی کو یقینی بنائے، جبکہ تمام ایمبولینسز کو فعال حالت میں رکھا جائے۔ایس ڈی ایم اے کو ہنگامی ردعمل کو مربوط کرنے کے لیے فوکل ایجنسی کے طور پر نامزد کیا گیا۔ اسے ضلعی سطح پر اہم ذمہ داری سونپی گئی ہے.اجلاس میں تعلیمی اداروں کو بے گھر افراد کے لیے عارضی پناہ گاہوں کے طور پر استعمال کرنے کے امکان پر بھی بات ہوئی۔ محکمہ ہائی ویز کو ہدایت کی گئی کہ ناران (خیبر پختونخوا میں) کو نوری ٹاپ کے راستے وادی نیلم کے علاقے سرگن سے ملانے والی سڑک کو ہنگامی نقل و حرکت اور نقل مکانی کے لیے کھلا رکھا جائے۔محکمہ صحت، تعلیم، سول ڈیفنس، کمیونیکیشن اینڈ ورکس، بجلی، ایس ڈی ایم اے اور ریسکیو 1122 کو ضروری خدمات قرار دیا گیا۔ ان محکموں میں ملازمین کے لیے پہلے دی گئی تمام چھٹیاں فوری طور پر منسوخ کردی گئیں۔اجلاس میں بتایا گیا کہ آزاد کشمیر کی قانون ساز اسمبلی کے تمام 13 حلقوں میں تقریباً 4 لاکھ 27 ہزار افراد نیلم سے لے کر جنوبی بھمبر ضلع تک ایل او سی کے پانچ کلومیٹر کے اندر رہتے ہیں جن کی حفاظت ہمارے لیے اہم ہے .